هەواڵێن سەرەکی

دهۆک

​ب بەرهەڤبوونا نوێنەرێ وەزیرێ خواندنا بلند و ڤەکۆلینێن زانستی، نوێنەرێ پارێزگارێ دهۆکێ، هەروەسا سەرۆکێ زانکۆیا زاخۆ و نوینەرێ سەرۆکێ زانکۆیا پۆلیتەکنیک هەولێر و رێڤەبەر و بەرپرسێن حکومی و حزبی و هەژمارەکا بەرچاڤ یا مامۆستا و ڤەکۆلەران، چوارەمین کۆنفرانسێ نێڤدەولەتیێ گەشەپێدانا سیستەمێ بەردەوامیێ (ICSSD 2026) ل روژا چوار شەمبی 2026\7\22ل ئوتێلا پەروەر دەستپێکر.

​ئەڤ کۆنفرانسە ژ لایێ زانکۆیا پۆلیتەکنیک یا دهۆک ب هەڤکاری دگەل سەنتەرێ مالیزی (ACARES) یێ خزمەتگوزاریێن ئەکادیمی و ڤەکۆلینێ، هەروەسا ب پشکداریا 11 زانکۆ و دەزگەهێن خواندن و ڤەکۆلینێ و ب پشتەڤانیا راستەوخۆ یا وەزارەتا خواندنا بلند و ڤەکۆلینێن زانستی ئامادەکرن بۆ هاتینەکرن.

​د پەیڤا دەستپێکرنێ دا پ. د. ئــــاری عـــادل، سەرۆکا زانکۆیا پۆلیتەکنیک دهۆک بخێرهاتنا مێهڤانان کڕ و ئاماژە ب گرنگیا بەردەوامبوونا زانکۆیێ ل سەر نویاتیێ و خۆگونجاندنێ دگەل تەکنۆلۆجیا سەردەم هاتە دان. سەرۆکا زانکۆیێ ئەو چەندە ژی روونکر کو ئارمانجا سەرەکی یا کۆنفرانسێ گرێداییە ب گەشەپێدانا سیستەمێن بەردەوام (SDGs)، ب تایبەتی د بوارێن ئاڤا پاقژ، ساخلەمیا ژینگەهێ، وزەیا پاقژ، پیشەسازی، داهێنان، ژێرخانە و خۆگونجاندن دگەل گۆڕانکاریێن کەشوهەوای.

​دەربارەی پشکداریا زانستی، پ. د. ئــــاری عـــادل گوت: ژبلی ڤەکۆلەرێن هەرێما کوردستانێ و عیراقێ، چەندین ڤەکۆلین ژ زانکۆیێن وەڵاتێن تورکیا، مالیزیا، هندستان، سعودیە، ڕووسیا، بەریتانیا، ئوردن و عومان هاتینە پێشکێشکرن. پشتی هەلسەنگاندنا زانستی 50 ڤەکۆلین هاتینە پەسەندکرن کو دێ دوو ڕۆژێن کۆنفرانسی دا هێنە گەنگەشەکرن و دیڤدا دێ ل گۆڤارێن ناڤدارین ئیندێکسکری د تۆڕا (Scopus) دا هێنە بەلاڤکرن.