هەواڵێن سەرەکی

ب هەلکەفتا هەیڤا ئۆکتۆبەرا پیڤازی و ب مەرەما بلندکرنا ئاستێ هشیاریێ دەربارەی پەنجەشێرا سینگی و گرنگیا دەستنیشانکرنا پێشوەخت بۆ پاراستنا ساخلەمیا خانمان، ل ڕۆژا چارشەمبی ڕێکەفتی ٢٨/١٠/٢٠٢٦، ل دەمژمێر ١٠:٠٠ـی سپێدێ، ل ژێر چاڤدێریا پ.د. ئاری عادل، سەرۆکا زانکۆیا پۆلیتەکنیک یا دهۆک، سەنتەرێ یەکسانیا جێندەری ب هەڤکاری دگەل ڕێکخراوا کۆمەلا ئافرەتێن بەغدا، سەمپۆزیومەک ل هۆلا ئازادی ل پەیمانگەها تەکنیکی دهۆک ئەنجامدا.

​ل دەستپێکێ ڕاگرا پەیمانگەها تەکنیکی شێخان، د. کوردمان محمد عەلی، پەیڤا سەرۆکاتیا زانکۆیا پۆلیتەکنیک یا دهۆک پێشکێشکر و گۆت:

"زانکۆیا پۆلیتەکنیک دهۆک نە تنێ ناڤەندەکا ئەکادیمییە، بەلکو پرەکا پەیوەندیانە بۆ خزمەتکرنا جڤاکی و ئاڤاکرنا هەڤپەیمانیێن بهێز دگەل ڕێکخراوێن جڤاکێ مەدەنی."

هەروەسا د. کوردمانێ دیار کر کو ئافرەتا ساخلەم بنەمایێ جڤاکەکێ پێشکەفتییە، و هشیارکرن ل دۆر پەنجەشێرا سینگی و دەستنیشانکرنا پێشوەخت نە تنێ ئەرکەکێ پزیشکییە، بەلکو ئەرکەکێ مرۆڤایەتی و جڤاکییە بۆ پاراستنا ژیانا خانمان و سەلامەتیا خێزانان.

​پاشان، ڕێڤەبەرا سەنتەرێ یەکسانیا جێندەری، شەهلا عیسا، د پەیڤا خۆدا دەستخۆشی ل سەرۆکاتیا زانکۆیا پۆلیتەکنیک دهۆک کر بۆ پشتەڤانیا بەردەوام یا ڤان چالاکیێن هشیارکرنێ، و ئاماژە ب وێ چەندێ کر کو هەیڤا (ئۆکتۆبەرا پیڤازی) دەرفەتەکە بۆ هشیارکرنا ژنان ل سەر گرنگیا پشکنینا پێشوەخت یا پەنجەشێرا سینگی و گۆت:

"پاراستنا ساخلەمیا ئافرەتان بنەمایەکێ سەرەکییە بۆ گەشەپێدان و پێشکەفتنا خێزان و جڤاکی."

​ژلایێ خۆ ڤە، لیزا نیسان حەیدو، سەرۆکا کۆمەلا ئافرەتێن بەغدا، د پەیفا خۆدا دیار کر کو هەیڤا ئۆکتۆبەرا پیڤازی نە تنێ بڕگەیەکا سالانە یە، بەلکو پەیاما هێڤی و ژیانێ یە و بانگەوازەکە بۆ هەمی خانمان کو گرنگیێ بدەنە ساخلەمیا خۆ و پشکنینێن پێشوەخت ئەنجام بدەن. هەروەسا دەستخۆشی ل زانکۆیا پۆلیتەکنیک یا دهۆک کر بۆ ڕێکخستنا ڤێ چالاکیا گرنگ و دەستپێشخەرییا د هەڤکاری و کارێ هەڤپشکدا پێخەمەت خزمەتکرنا ئافرەتان و جڤاکی.

​د پشکەکا دی یا سەمپۆزیومێ دا، پەنەلەکێ هشیارکرنێ هاتە ڕێڤەبرن کو تێدا پ. هـ. د. جنان نوری حسن بسپۆرا نەخۆشیێن ژنان و زارۆکبوونێ.

و ​د. نازک عبدالرحیم عبدالکریم، تایبەتمەندا نوژداریا جڤاکی و بەرپرسا پشکا ئامارێ ل نەخۆشخانەیا ئومێد یا شێرپەنجێ و خانم ژەنین سەلاح، رزگاربۆیا شێرپەنجێ پشکداربوون و تەوەرێن زانستی و ئەزموونا ژیانا خۆ پێشکێشی ئامادەبوویان کر.