هەواڵێن سەرەکی

ل ژێر چاڤدێری و بەرهەڤبوونا نوێنەرێ وەزیرێ خۆێندنا باڵا و ڤەکۆلینێن زانستی، و ب ئامادەبونا پ. د. ئاری عادل سەرۆکا زانکۆیا پۆلیتەکنیک دهۆک، د گەل پ. هـ. د. دیار صائب، رێڤەبەرێ گشتیێ سەنتەرێ ڤەکۆلینێن زانستی، و پ.د. سدیق یوسف ئەمین، و ب مێڤاندارییا زانکۆیا ڕاپەڕین و ب هەڤپشکی ل گەل هەشت زانکۆیێن دی یێن ناوخۆیی و نێڤدەوڵەتی، کارێن دووەمین کۆنفرانسێ نێڤدەوڵەتی یێ

"ژیرییا دەستکرد بۆ بەردەوامیدانێ د جیهانا بەرەڤ پێشڤەچوونێ دا (AISDW26)"

ل ڕۆژێن ٣ و ٤ی ۱۱ یا ساڵا ٢٠٢٦ێ ب شێوازێ ڕاستەوخۆ و ئۆنلاین (هایبرید) ل هۆلا چالاکیێن کۆلێژا پەروەردا بنەڕەتی ل زانکۆیا ڕاپەڕین ل شاری ڕانیە ب سەرکەفتن ب دوماهی هاتن.

​د ئەڤی کۆنفرانسی دا، ژمارەکا زور یا ڤەکۆلەر، زانا و پسپۆڕێن بوارێ تەکنۆلۆجیایێ ژ زانکۆ و ناڤەندێن ئەکادیمی یێن هەرێما کوردستانێ، عێراقێ و جیهانێ، ل گەل بەرپرسێن حکومی و حزبی پشکدار بوون.

​ئەڤ چالاکیا زانستی بەرهەمێ هەماهەنگیەکا ئەکادیمی یا ب هێز بوو د ناڤبەرا ٩ زانکۆیان دا کۆ پێک دهاتن ژ ​زانکۆیا ڕاپەڕین، ​زانکۆیا پۆلیتەکنیکی یا دهۆک، زانکۆیا ئاکرێ بۆ زانستێن کرداری،​ زانکۆیا تون حسێن ئۆن یا مالیزیا (UTHM)، ​زانکۆیا هەولێرا نێودەوڵەتی، ​زانکۆیا پۆلیتەکنیکی یا گەرمیان، ​زانکۆیا زاخۆ، زانکۆیا سۆران و ​زانکۆیا لوبنانی فەرەنسی ، وسەرپەرشتیا گشتی ژ لایێ سەرۆکێن زانکۆیێن هەڤپشک ڤە هاتە کرن. دیسان پ.د. جەمال عەلی عومەر وەک سەرۆکێ جێبەجێکار، پ.د. فەرسەت حیتۆ عەبدولڕەحمان وەک هاوسەرۆک، پ.د. سدیق یوسف ئەمین ژ زانکۆیا پۆلیتەکنیک دهۆک وەک سەرۆکێ لێژنا زانستی، و پ.هـ.د. عادل عەلی حەسەن وەک سەرۆکێ لێژنا ئامادەکار، ل گەل سکرتێرێن کۆنفرانسی د. سامان محەمەد عومەر و پ.هـ.د. ئەیاد نوری فەقێ ڕۆلەکێ سەرەکی د سەرخستنا کۆنفرانسی دا گێڕا.

​ل ڕۆژا ئێکێ یا کۆنفرانسی سێشەمبی، ٣ی تشرینا دووێ 𝟐𝟎𝟐𝟔، مەراسیما ڤەکرنێ ب سرودا نیشتمانی و خواندنا چەند ئایەتێن قورئانا پیرۆز دەست پێکر. پاشان ئاخڤتنا سەرۆکا زانکۆیا ڕاپەڕین ژ لایێ پ.هـ.د. پەیمان ڕەمەزان ئەحمەد هاتە پێشکەشکرن، کو تێدا جەخت ل سەر گرنگیا بەستنا ژیرییا دەستکرد ب گەشەپێدانا بەردەوام د بوارێن کۆمەڵایەتی، ئابووری و ژینگەیی دا کر بۆ بەرەڤرۆبوونا ئاڵنگارییان.

​ژلایەکێ دیڤە ئاخڤتنا نوێنەرێ وەزارەتا خۆێندنا باڵا پ.د. خەتاب ئەحمەد مستەفا شێخانی و ئاخڤتنا سەرۆکێ جێبەجێکار پ.د. جەمال عەلی عومەر هاتنە خواندن. هەر د ئەڤێ ڕۆژێ دا پێنج سێمینارێن سەرەکی (Keynote Speeches) ژ لایێ زانایێن نێڤدەوڵەتی و نافخۆیی هاتنە پێشکەشکرن ب ئەڤێ شێوێ ل خوارێ دیارکری

پ.د. سەبیح لەفتە فەرحان (عراق): ل سەر ژیرییا دەستکرد بۆ شارێن بەردەوام و کەلەپوورێ دیجیتاڵی،

​پ.د. کیران سود (هیندستان): ل سەر ژیرییا دەستکرد یا ڕوون کری د ئاشکراکرنا ساختەکارییا دارایی دا (FinTech).

پ.هـ.د. ئاشیش شارما: ل سەر ئاڤاکرنا ژیرییا دەستکرد ب تێچوویەکا کێم و جێی متمانە.

​پ.هـ.د. محەمەد ئەسرول نەسید مەسرۆم (مالیزیا): ل سەر تەکنۆلۆجیا نقوومکەر د ژێرخانا کەسک دا.

​پ.د. ئەحمەد عاتیف محەمەد فەوزی (مالیزیا): ل سەر ڕۆبۆتێن مەیدانی یێن ژیرییا دەستکرد.

​کۆنفرانسی ۱۰ تەوەرێن سەرەکی بخۆ ڤە کرت بوون کۆ پێک دهاتن ژ بابەتێن تەندروستی، بازرگانی، پەروەردە، ئاڤ وهەوا، ئاسایش، ئۆتۆمبێلێن خۆئاژۆ، و کشتوکاڵ.

​د درێژاهیا دوو ڕۆژێن کۆنفرانسی دا، ۱۰ ڕوونشتنێن زانستی ل هۆڵێن B8, B9, B10, B11, B12 هاتنە سازکرن و زێدەتر ژ ٥۰ ڤەکۆلینێن زانستی یێن ڕەسەن ژ لایێ ڤەکۆلەرێن کوردستان، عێراق، مالیزیا، بەریتانیا، هیندستان، ئیندۆنیزیا، ئیتاڵیا، ئێران و چینێ هاتنە پێشکەشکرن. ڤەکۆلین ل سەر بابەتێن گرنگ بوون وەکی: گەشەپێدانا زمانی کوردی و ناسینا شێوەزاران، دەستنیشانکرنا پێشوەختە یا شێرپەنجێ و شەکرێ، حوکمرانیا ئەلیکترۆنی، و پێشبینیکرنا سەقای د هەرێمێ دا.

دهێتە زانین کو ​هەموو ڤەکۆلینێن پەسەندکری پاش هەڵسەنگاندنا زانستی

(Double-Blind Peer Review) دێ ژ لایێ وەشانخانێن جیهانی (Springer Nature Link) و (Emerald Publishing) هێنە بەلاڤکرن.

​ل ڕۆژا دووێ چوارشەمبی، ٤ی تشرینا دووێ 𝟐𝟎𝟐𝟔، د مەراسیما ب دوماهیک هاتنێ دا، ڕاسپاردێن کۆنفرانسی هاتنە خواندن کو جەخت ل سەر وەبەرهێنانێ د ژێرخانا دیجیتاڵی دا و دانانا چوارچۆڤەکێ یاسایی و ئەخلاقی بۆ بەکارئینانا ژیرییا دەستکرد کر.

​ل دوماهیا مەراسیمێ، پشتی بەخشینا باوەرنامێن ڕێزلێنانێ، ب فەرمی هاتە ڕاگەهاندن کو سێیەمین کۆنفرانسێ نێڤدەوڵەتی یێ AISDW د ساڵا ۲۰۲۷ێ دا دێ ژلایێ زانکۆیا لوبنانی فەرەنسی (LFU) ل هەولێرێ هاتە مێڤاندریکرن و ڕێکخستن. کارێن کۆنفرانسی ب گەشتەکا زانستی و گەشتیاری بۆ مێڤانان ل سنوورێ ئیدارەیا سەربەخۆ یا ڕاپەڕین ب دوماهی هاتن.