هەواڵێن سەرەکی

ئەڤرۆ، ڕۆژا ئێکشەمبی، سەرۆکا زانکۆیا پۆلیتەکنیک دهۆک پێشوازی ل چوار مامۆستایێن ئەکادیمی یێن زانکۆیێ کر، ئەوێن ناڤێن وان د لیستا ناڤدارا هاوبەشا دەزگەهێ (Elsevier) و زانکۆیا (Stanford) یا جیهانی دا هاتینە تۆمارکرن، ئەو لیستە تایبەتە ب دەستنیشانکرنا دوو (٢٪) ژ باشترین زانایێن سەر ئاستێ جیهانی.

د ڕێوڕەسمەکێ فەرمی دا، سەرۆکا زانکۆیێ پ.د. ئاری عادل، ب ئامادەبوونا پ.د. موئەیەد بەرەکات، هاریکارێ سەرۆکا زانکۆیێ بۆ کاروبارێن کارگێری و دارایی، پێشوازی ل زانایێن ناڤێن وان ل خوارێ کر:

• پ.د. عدنان محسن عبدالعزيز، پسپۆرێ زیرەکیا دەستکرد و پرۆسێسکرنا وێنان.
• پ.د. صبحي رفيق محمد، پسپۆرێ زیرەکیا دەستکرد و پرۆسێسکرنا وێنان.
• پ.هـ.د. احمد فتاح عبدالرحمن، پسپۆرێ فیزیا کرداری.
• پ.هـ.د. هیوا مجید محي الدين، پسپۆرێ زیرەکیا دەستکرد و پرۆسێسکرنا وێنان.

سەرۆکا زانکۆیێ رێز و سوپاسیا سەرۆکاتیا زانکۆیێ پێشکێشی مامۆستایان کر و ئەڤ دەستکەفتا ئەکادیمی یا گرنگ بلند نرخاند. هەروەسا پشتەڤانی و پالپشتیا زانکۆیێ بۆ بلندکرنا ئاستێ ڤەکۆلینێن زانستی و بهێزکرنا پێگەهێ ئەکادیمی ل سەر ئاستێ نێڤدەولەتی دووبارە کرە ڤە

ل دوماهیا ئەڤێ ڕێوڕەسمێ دا، سەرۆکا زانکۆیێ پیرۆزباهیێن تایبەت ئاراستەی زانایان کرن دەست خوشی لێکڕ و ئەڤ دەستکەفتە وەک دەستکەفتەکا نیشتمانی یا گرنگ بۆ زانکۆیێ دا دیارکرن، هیڤیا سەرکەفتنێن زێدەتر بۆ مامۆستایان خواست، بۆ خزمەتکرنا زانستی و پێشخستنا کۆمەڵگەهێ و بلندکرنا ناڤێ زانکۆیێ د ناڤەندێن زانستی یێن جیهانی دا.

هەروەسا، د هەمان هەلکەفتێ دا، رێز و سوپاسیا مامۆستایێ زانکۆیێ پ.هـ.د. سەردار عومەر ساڵح، کر ژبەر بزاڤێن وی بۆ زێدەکرنا زمانێ کوردی د (Microsoft Office) دا.