هەواڵێن سەرەکی

دهۆک

​د چوارچۆڤەیێ پشتگیریکرنا پرۆسەیا چاکسازیێ د سیستەمێ پەروەردا تەکنیکی و پیشەیی (TVET) دا، زانکۆیا پۆلیتەکنیکی یا دهۆکێ پێشوازی ل شاندەکێ ئاست بلند یێ ئێکەتی یا ئەوروپا و نوینەرایەتیا ڕێکخراوا یونسکۆ ل عێراقێ کر.

​د روینشتنەکێ دا پ .د. ئــــاری عــــادل، سەرۆکا زانکۆیا پۆلیتەکنیکی یا دهۆکێ بخێرهاتنا هەر ئێک ژ بەرێزان ویم ریپما، سەرۆکێ هاڤکاریان د نوینەرایەتیا ئێکەتی یا ئەوروپا ل عێراقێ، ستیڤن دی ڤرینت، بڕێڤەبەرێ پرۆگرامان، بلال الحمایدة، پسپۆڕێ پرۆگرامێ TVETد یونسکۆ دا، و حەیدەر الحبوبی، بەرپرسێ پرۆژەیێ نیشتمانی د یونسکۆ دا کر و جەخت ل سەر دەستکەفتێن دەهـ سالێن هەفپشکی یا دناڤبەرا زانکۆیێ و ئەڤان ڕێکخراوان دا کرن، ب تایبەت د بوارێن جێبەجێکرنا پرۆسەیا بولۆنیا، بهێزکرنا سیستەمێ دلنیایی جۆری، و گونجاندنا لێهاتنان ب بازاڕێ کاری ڤە.

ژلایەکێ دیڤە ​بەرنامەیێ ئەڤێ پێشوازیێ ب کۆموونەکا بەرفرەهـ دەستپێکر، پاشان شاندێ مێهڤان سەردانا پشک و ژینگەهێن فێرکرنێ ل کامپۆسا زانکۆیێ دان. د کموبونەکا دارێژتی دا، هاریکارێن سەرۆک زانکۆیێ و رێڤەبەرێن سەرۆکاتیا زانکۆیێ ئەنجامێن چاکسازیێن ژ سالا ٢٠١٥ێ وەرە هاتینە ئەنجامدان دانە دیارکرن، کو ژ وان: گەشەپێدانا چاڤدێریکرنا بازاڕێ کاری، پەرەپێدانا ئاڵوگۆڕا ئەکادیمی لگەل زانکۆیێن ئەوروپی، و بهێزکرنا پەیوەندیان لگەل سێکتەرێ تایبەت.

​د دوماهیا ئەڤێ پێشوازیێ دا، هەردوو لایەنان تەکەزی ل سەر بەردەوامیا هەماهەنگیێ و ڤەکرنا ئاسۆیێن نوو بۆ هافکاریا زانستی کر، و سەرۆکاتیا زانکۆیا پۆلیتەکنیکی یا دهۆکێ ڕێز و سوپاسیا خۆ بۆ پشتگیریا بەردەوام یا ئێکەتی یا ئەوروپا و یونسکۆدەربڕی.