هەواڵێن سەرەکی

د چارچۆڤێ پێشخستنا پەیوەندیێن زانستی و ئەکادیمی د ناڤبەرا زانکۆیێن هەرێما کوردستانێ دا، مامۆستایێن پشکا ميكانيك و وزا روژێ ل پەیمانگەها تەکنیکی یا دهۆک سەر ب زانکۆیا پۆلیتەکنیک دهۆک ڤە، وۆرکشۆپەکێ زانستی یێ تایبەت ل ژێر ناڤ ونیشانێن

"Fundamentals of 3D Printing: Basic Concepts"

ل کۆلیژا ئەندازیاری یا زانکۆیا زاخۆ پێشکێش کر.

ب مەرەما ئالۆگۆڕکرنا شارەزاییێن تەکنیکی د ناڤبەرا زانکۆیا پۆلیتەکنیک دهۆک و زانکۆیێن ئەکادیمی، و پێخەمەت ئاشناکرنا قوتابیان ب نووترین تەکنەلۆژیایێن جیهانی یێن کو د بازاڕێ کار و پیشەسازیێ دا دهێنە بکارئینان و ب ئامادەبوونا هژمارەکا مامۆستا و قوتابیان، چوار وانەیێن زانستی و پراکتیکی ژ لایێ بسپۆرێن بوارێ ميكانیکیێن زانکۆیا پۆلیتەکنیک دهۆک ڤە بۆ هژمارەکا ماموستا ۆ قوتابیێن کولیژا ئەندازیاریا زانکۆیا زاخۆ هاتنە پێشکێشکرن ب ئەڤێ شێوێ خوارێ دیارکری:-

​گرنگیا تەکنەلۆژیا :3D مامۆستا سمیان ئومید, بەرپرسێ پشکێ، دوو وانە پێشکێش کرن. تێدا تیشک خستە سەر رۆلێ چاپا سێ رەهندی د بوارێن ئەندازیاری و پیشەسازی دا، هەروەسا شرۆڤەکرنا پرۆسەیێن چاپکرنێ ب رێکێن وەک .(FDM, SLM, SLS)

​دیزاین و نەخشەسازی: مامۆستا حاتم ابراهیم, وانەیەک ل دۆر چەوانیا ئەنجامدانا دیزاینان ب رێکا پرۆگرامێ جیهانی یێ (SolidWorks) پێشکێش کر، کو بنەمایەکێ سەرەکییە بۆ کارێ چاپا سێ رەهندی.

​لایەنێ پراکتیکی: مامۆستا شمال رشید, وانەیا دوماهیێ ل دۆر ناساندنا پرۆگرامێن (Slicing software) پێشکێش کر و ب شێوەیەکێ پراکتیکی چەوانیا کارکرنا ئامیرێن چاپێ نیشا ئامادەبوویان دان.