هەواڵێن سەرەکی

ل دۆر پشتەڤانیکرنا ئارمانجا دووێ ژ ئارمانجێن گەشەپێدانا بەردەوام (نەهێلانا برسیاتیێ)، پەیمانگەها تەکنیکی یا شنگال ل رێکەفتی ١٨/٠١/٢٠٢٦ێ، ب ئامادەبوونا هاریکارێ ڕاگری و سەرۆک پشکێن زانستی و مامۆستایان، سیمینارەکا زانستی پێشکێش کر کو ژ لایێ د. محمد عبدالعزيز أحمد، سەرۆکێ پشکا کارگێڕی کار و نوینەرێ پەیمانگەها تەکنیکی یا شنگال ل سەرۆکاتیا زانکۆیا پۆلیتەکنیکی یا دهۆک هاتە پێشکێشکرن، ل ژێر ناڤ و نیشانێن:

ڕۆلێ پەیمانگەها تەکنیکی یا شنگال د پشتەڤانیکرنا ئارمانجا دووێ ژ ئارمانجێن گەشەپێدانا بەردەوام (نەهێلانا برسیاتیێ) د بن سێبەرا بارودۆخێن جڤاکی و ئابووری یێن دەڤەرێ دا.

د ڤێ سیمینارێ دا ب شێوەیەکێ ڕاستەوخۆ تیشک هاتە ئێخستنە سەر بابەتێ (نەهێلانا برسیاتیێ)، و ڕوونکردنین پێدڤی ل دۆر ڕاستیا نەبوونا خارنا تێر و پڕ ل قەزا شنگالێ و کارتێکرنا وێ ل سەر ساخلەمیا قوتابیان، پرۆسەیا خاندنێ و سەقامگیریا جڤاکی هاتنە دیارکرن، ب تایبەت د بن سێبەرا ئاستەنگێن جڤاکی و ئابووری یێن ناوخۆیی دا.

هەروەسا د سیمینارێ دا ڕۆلێ ئەکادیمی و جڤاکی یێ پەیمانگەها تەکنیکی یا شنگال بۆ پشکداریکردن د نەهێلانا برسیاتیێ دا هاتە شلوڤەکرن، ئەو ژی ب ڕێکا بەلاڤکرنا هۆشیاریا خارنێ، پشتەڤانیکرنا قوتابیێن خودان داهاتێ کێم، و گرێدانا خاندنێ ب پێدڤیاتیێن جڤاکی ڤە، زێدەباری پێشکێشکرنا چەندین پێشنیار و دەسپێشخەریێن کریاری کو بشێن دگەل لایەنێن پەیوەندیدار یێن خۆجهی و مرۆڤی بهێنە جێبەجێکرن.

ل دوماهیێ، پەیمانگەها تەکنیکی یا شنگال پابەندبوونا خۆ یا بەردەوام دوپات دکەت بۆ پشتەڤانیکرنا ئارمانجا نەهێلانا برسیاتیێ و پشکداریا کارا د بجهئینانا ئارمانجێن گەشەپێدانا بەردەوام دا ب مەرەما خزمەتکرنا جڤاکێ دەڤەرێ.