هەواڵێن سەرەکی

د چوارچۆڤێ ئامادەکاریان بۆ دەستپێکرنا ساڵا نوو یا خوێندنێ (٢٠٢٦-٢٠٢٧)، ئەڤرۆ ڕۆژا چوارشەمبی ڕێکەفتی ١٩ی تەباخا ٢٠٢٦ێ، بەرێز پ. د. ئاری عادل، سەرۆکا زانکۆیا پۆلیتەکنیکی یا دهۆک، ل سەرۆکاتیا زانکۆیێ پێشوازی ل نوێنەرێن مامۆستایێن کۆلیژ و پەیمانگەهێن تەکنیکی یێن سەر ب زانکۆیێ ڤە کر.

​مەبەستا سەرەکی یا ئەڤێ روینشتنێ دانوستاندن بوو ل سەر ئاستەنگ، ئاریشە و داخوازیێن کادرێ ئەکادیمی و زامنکرنا ژینگەهەکا گونجای بۆ دەستپێکرنا وەرزی نوو یێ خواندنێ، و بۆ ئەڤێ مەرەمێ د ڕوینشتنەکێ دا، نوێنەرێن مامۆستایان سوپاسیا سەرۆکاتیا زانکۆیێ کر بۆ ئەڤێ پێشوازیێ، و ئاریشەیێن سەرەکی یێن مامۆستایان ئاراستەی سەرۆکا زانکۆیێ کرن.

دئەڤێ دیدارێ دا دانوستاندن لسەر گرفت و ئاستەنگ و شایستەیێن ماموستایان هاتە کرن، و سەرۆکا زانکۆیێ ب گەرمی پێشنیاز، دیتن و بۆچوونێن نوێنەرێن مامۆستایان وەرگرتن و بەرهەڤیا زانکۆیێ دەربڕی بۆ چارەسەرکرنا ئاستەنگان، وژلایەکێ دیڤە سەرۆکاتیا زانکۆیێ تەکەزی لسەر وێ چەندێ کڕ کو ب زوویترین دەم دووڤچوون بۆ بدەستڤەئینانا هەمی مافێن مامۆستایان بهێتە کرن بەری دەستپێکرنا ساڵا نوو یا خوێندنێ ٢٠٢٦-٢٠٢٧، و ل دویماهیێ سەرۆکا زانکۆیێ پێشنیاز کر کو کۆنوسەکێ کارگێڕی ژلایێ نوێنەران ڤە بهێتە ئامادەکرن، کو هەمی داخوازی و گرفت تێدا بهێنە نڤیسن دا کو ب ڕێکارێن فەرمی دووڤچوون و چارەسەری بۆ بهێنە کرن.

​ئەڤ دیدارە د چوارچۆڤێ ستراتیژیەتا زانکۆیا پۆلیتەکنیکی یا دهۆک داهێت بۆ پشتبەستن ل سەر دیالۆگا راستەوخۆ دگەل مامۆستا و توێژا ئەکادیمی، پێخەمەت بلندکرنا ئاستێ زانستی و کارگێڕی ل زانکۆیێ.