هەواڵێن سەرەکی

وەزارەتا خواندنا بلند ل گەل پەیمانگەهەکا ئەمریکی (MIT) پڕۆژەیەکێ دامەزراندنا سەنتەرێن کارسازی ئێخستنە کاری و دێ پەرەپێدانا شیانێن کارسازی ژی کەتە پشکەک ژ پڕۆسەیا خواندنا زانکۆیان.

وەزارەتا خواندنا بلند و ڤەکۆڵینێن زانستی د چوارچۆڤەیێ بزاڤێن خۆ دا بۆ پەرەپێدانا ب شیانێن داهێنان و کارسازی ل ناڤەندێن خواندنا بلند و ب هەماهەنگی ل گەل پەیمانگەها ماساچووسیتس یا تێکنۆلۆژیا (MIT) یا ئەمریکی پڕۆژەیێ دامەزراندنا سەنتەرێن کارسازی ئێخستنە د بیاڤێ بجهئینانێ دا.

تیما شیرەتکاری یا وەزارەتا خواندنا بلند ب ئامادەبوونا ڕێڤەبەرێ گشتی یێ خواندن و پلاندانان و دیڤچوونێ و نوونەرێ ڕێکخراوا (IREX) یا ئەمەریکی ل وەزارەتێ و زێدەباری نوونەرێ کۆنسوڵخانەیا گشتی یا ئەمریکا ل هەولێرێ کۆمبوونەک ل گەل وان مامۆستایان کر یێن پشکداری کۆرسێ پەرەپێدانا شیانێن کارسازی بووین.

و ل گورەی کارنامەیا پڕۆژەی، شاڕەزایێن وێ پەیمانگەهێ دێ د قوناغا ئێکێ دا ب ئەرکێ ڕاهێنانکرنێ ب مامۆستایێن زانکۆیێن کوردستانێ ڕاین و ب ڕێیا سەنتەران ژی دێ بەڕنامەیەکێ خواندنێ یێ تایبەت دەربارەی ڕاهێنان و پەرەپێدانا شیانێن کارسازی ل زانکۆیێن هەرێما کوردستانێ هێتە دانان و دێ بیتە پشکەک ژ پڕۆسەیا خواندنا زانکۆیان.

پەیمانگەها ماساچووسیتس یا تێکنۆلۆژیا (Massachusetts Institute of Technology) (MIT) ل دیف ڕێزبەندییا نێڤدەولەتی یا (شانگەهای) ل سەر ئاستێ جیهانێ ل ڕێزا سێیێ دهێت و حکومەتا ئەمریکی و کۆنسوڵخانەیا گشتی یا ئەمریکا ل هەرێما کوردستانێ پشتەڤانییێ لێ دکەن و بڕیارە بۆ هەژدە مەهان ل گەل وەزارەتا خواندنا بلند و ڤەکۆڵینێن زانستی کار بکەت.