هەواڵێن سەرەکی

دهۆک

​ل رۆژا دووشەمبی ڕێکەفتی (١٨/٥/٢٠٢٦)، ل دەمژمێر (١٠:٠٠) سپێدێ ل ئاڤاهیێ سەرۆکاتیا زانکۆیێ، جڤاتا زانکۆیا پۆلیتەکنیک دهۆک کۆمبوونا خویا ئاسایی یا ژمارە (٥) بۆ سالا خواندنێ (٢٠٢٥-٢٠٢٦) ب سەرپەرشتیا بەرێز سەرۆکا زانکۆیێ، پ. د. ئـاری عادل، و ب ئامادەبوونا ئەندامێن جڤاتێ و نوینەرێ ماموستا و قوتابیان ئەنجامدا. د ڤێ کۆمبوونێ دا، دانوستاندن ل سەر چەندین تەوەرێن گرنگ یێن زانستی، کارگێڕی، و کاروبارێن قوتابیان هاتە کرن.

​ل دەستپێکا کۆمبوونێ، سەرۆکا زانکۆیێ هژمارەکا راسپاردە و رێنمایان پێشکێشی ئەندامێن جڤاتێ کرن ب مەرەما پێشخستنا رەوشا زانستی و ئەکادیمی یا زانکۆیێ. پاشان ب شێوەیەکێ تێر و تەسەل بەحس ل خالێن بەرنامێ کاری هاتە کرن، د تەوەرێ کاروبارێن زانستی دا، جڤاتێ کونووسێ لێژنا بەرزکرنا پلا زانستی پەسەندکر. هەروەسا تەکەزی ل سەر بەشداری و هەڤپشکی یا زانکۆیێ د سێ کۆنفرانسێن زانستی یێن نێڤدەولەتی یێن گرنگ دا کرن کو د هاڤینا ئەڤسالە دا دێ هێنە گێڕان، بناڤ و نیشانێن

• ​کۆنفرانسێ (ICAIEAS 2026)ل گەل زانکۆیێنزاخۆ وسۆران.
• ​کۆنفرانسێ (ICSSHR2026) ل گەل ناڤەندا "وعي" یا راوێژکاری.
• ​کۆنفرانسێ (ICSSD 2026) ل گەل سەنتەرێ ئەکادیمی یێ مالێزی (ACARES) و زانکۆیا پۆلیتەکنیک یا هەولێر.

د هەمان دەم دا، پلانا ستراتیجی یا سەنتەرێ توێژینێن زانستی بۆ سالا (٢٠٢٦-٢٠٢٧) و رێنمایێن دیارکرنا ئاستێ گۆڤاران و خەرجکرنا شایستەیێن دارایێن ڤەکۆلینان هاتنە گەنگەشەکرن.

ژلایەکێ دیڤە ​کاروبارێن قوتابیان و بەشێن نافخۆیی هاتنە بەحسکرن و گرنگیەکا تایبەت ب کاروبارێن قوتابیان هاتە دان، و وەسا هاتە پێشبینکرن کو د ڤێ هاڤینێ دا سەخبیریەکا پێدڤی بۆ ئاڤاهیێن بەشێن نافخۆیی بهێتەکرن و ئاریشەیێن بهایێ کارەبێ ژی بهێنە چارەسەرکرن. هەروەسا بڕیار ل سەر دیارکرنا دەمێ خولا دوویێ یا ئەزموونان، سەرەدەری کرن دگەل مەشقا هاڤینێ، و دیارکرنا رێزبەندیا قوتابیێن ئێکەم (ئێک، دوو، سێ) هاتە دان ب مەرەما ڤەگەراندنا پارەی بۆ قوتابیێن پارالێل و ئێڤاران. لایەنەکێ دی یێ دانوستاندنێ یێ تەرخانکری بوو بۆ چەوانیا وەرگرتنا دەرچوویێن ئێکەم یێن پەیمانگەهان (پشکێن ( IT) ل کۆلیژێن تەکنیکی.

د تەوەرێ ​کاروبارێن کارگێڕی و دارایی دا، جڤاتێ بەحس ل پرسا کەمپێن زانکۆیێ، قیستێ قوتابیێن دەرچوونێ، پێشینەیێن هەیڤانە و میکانیزمێن مەزاختنێ کر. هەروەسا پێداچوون د زانیاری و گرێبەستێن ماموستایێن میلاک دا هاتە کرن بۆ رێکخستنا کاروبارێن کارگێڕی یێن ماموستایان.

ل دویماهیێ سەرۆکا زانکۆیێ سوز دا کو ئەو پرسیار و پێشنیاز و راسپاردێن هاتنە ئاراستەکرن ل دویف رێنمایان بهێنە جێبەجێکرن پێخەمەت خزمەتکرنا زێدەتر یا کەرتێ زانستی و قوتابیان ل زانکۆیا پۆلیتەکنیک دهۆک.