هەواڵێن سەرەکی

لژێر چاڤدێریا پ. د. ئــاری عـــادل، سەرۆکا زانکۆیا پۆلیتەکنیکی یا دهۆک و ب ئامادەبوونا هاریکارێ سەرۆکا زانکۆیێ، راگرێ پەیمانگەها تەکنیکی دهۆک، ڕێڤەبەرێ گشتییێ پەروەردا پارێزگەها دهۆکێ، و هاریکارێ ڕێڤەبەرێ باژێرڤانیا دهۆکێ، ڕێڤەبەرێن پەروەردا ڕۆژهەلات و ڕۆژئاڤا و هژمارەکا مامۆستا و فەرمانبەران، راگریا پەیمانگەها تەکنیکی دهۆک ب دوماهیک هاتنا دو خولێن گرنگ یێن پێگەهاندنا کادرێن دامودەزگەهێن حکومی ل پارێزگەها دهۆکێ ڕاگەیاند.

​ئەڤ خولە ل پەیمانگەها تەکنیکی دهۆک هاتبوونە ڕێکخستن، کو خولا ئێکێ ل دور "هەوارهاتنێن دەستپێکی (First Aid)" بوو ژلایێ پشکا پەرستاری ڤە بۆ ۲٤ مامۆستایێن پەروەردا ڕۆژهەلات و ڕۆژئاڤا هاتبوو پێشکێشکرن. خولا دووێ ژی ل دور بەرنامەیێن "AutoCAD & Civil 3D" بوو، کو ژلایێ پشکا ڕۆپیڤان ڤە بۆ ۲٥ فەرمانبەرێن ڕێڤەبەریا باژێرڤانیا دهۆکێ هاتبوو ڕێکخستن.

​د پەیاما سەرۆکا زانکۆیێ دا هاتە دوپاتکرن کو زانکۆ نە بتنێ جهێ فێرکرنا تیۆرییە، بەڵکو ئەرکێ وێ یێ سەرەکی خزمەتکرنا جڤاکی و بلندکرنا ئاستێ کارگێڕی و پێشەیی یە ل دەڤەرێ. و ژلایەکێ دیڤە ئەوچەندە ژی هاتە ئاشکراکرن کو خزمەتگوزاریێن زانکۆیێ د بەردەوامن و ڕاستەوخۆ پاش ڤان خولان، پشکدارێن ڕێڤەبەریا باژێرڤانیێ دێ دەست ب خولەکا نوو کەن ب ناڤێ "Engineering Design with SketchUp" کو ژلایێ پشکا تەکنۆلۆجیا بیناکاری یا پەیمانگەها تەکنیکی دهۆک ڤە دێ هێتە گۆتن.

​ل دوماهیا ڕێوڕەسمان، دەستخۆشی ل ڕاگرییا پەیمانگەها تەکنیکی یا دهۆک، پشکێن زانستی، مامۆستا، ڕێکخەر و هەمی پشکداربوویێن خولان هاتە کرن بۆ سەرکەوتنا ڤان چالاکیان و باوەرنامێن پشکداریێ ژلایێ ئامادەبویان ڤە ب سەر پشکدارێن خولێ هاتنە بەلاڤکرن.