هەواڵێن سەرەکی

پێخەمەت پاراستنا خێزانێ و ئاڤاکرنا جڤاکەکێ هشیار، پەیمانگەها تەکنیکی یا شنگال ب هەماهەنگی دگەل ڕێڤەبەریا بەرهنگاربوونا توندوتیژی دژی ئافرەتان و خێزانێ ل پارێزگەها دهۆکێ و ب هەڤکاری دگەل ڕێکخراوا (The Lotus Flower)، سمینارەکا بەرفرەهـ بۆ قوتابیان ل هۆڵا پەیمانگەهێ سازکر.

​د پشکا ئێکێ یا سمینارێ دا، ڕائید هەیفا مەحمود حەمید, ئەفسەرا ڤەکۆلینێ ل نڤێسینگەها نزارکێ، ب هوویری بەحس ل ئەرک و بەرپرسیاریەتیێن ڕێڤەبەریا بەرهنگاربوونا توندوتیژیێ کر. ناڤبری تیشک خستە سەر رێکارێن یاسایی و چەوانیا بڕێڤەچوونا پرۆسا ڤەکۆلینێ (تەحقیقێ) د وان کەیسان دا یێن کو گرێدای توندوتیژیا دژی ئافرەت و خێزانێ نە، ب مەبەستا دەستەبەرکرنا مافێن قوربانیان.

​

​تەوەرێ دوویێ یێ سمینارێ یێ تایبەت بوو ب لایەنێ یاسایی ڤە کو ژ لایێ موقەدەم فەلاح حەسەن جیان, بەرپرسێ بەشێ ڕاگەهاندن و پەیوەندیان ڤە هاتە پێشکێشکرن، دئەڤی تەوەری دا، ب شێوەیەکێ گشتی بەحسی یاسایا ژمارە (٦) یا سالا ٢٠٠٨ێ هاتە کرن، کو تایبەتە ب قەدەغەکرن و خراب بکارئینانا ئامیرێن پەیوەندیکرنێ ل هەرێما کوردستانێ، و هەروەسا تەکەزی لسەر وان سزایێن یاسایی کڕ یێن دکەڤنە سەر وی کەسێ ئامیرێن موبایلێ یان تۆرێن جڤاکی بۆ مەبەستێن نەدرۆست و توندوتیژیێ بکار دئینیت، و دوپاتی لسەر وێ چەندێ کڕ کو تەکنۆلۆژیا ب هشیاری و د رێکێن دروست دا بکار بینن.

​ئەڤ چالاكیە د چارچۆڤێ زنجیرە سمینارێن پەیمانگەهێ دا دهێت بۆ زێدەکرنا زانیاریێن یاسایی یێن قوتابیان و پاراستنا وان ژ هەر جۆرە هەڕەشە و توندوتیژیەکا جڤاکی یان ئەلکترۆنی، دا کو پاشەرۆژەکا ئارامتر بۆ خێزانێ و جڤاکی دابین بکەن.