ئەکادیمی

technical.college.of.zakho ڕێکارێن نوو یێن پلاتفۆرمێن ڤەکۆلینان د وۆرک شۆپەکێ دا ل کۆلیژ و پەیمانگەها تەکنیکی یا زاخۆ هاتنە روونکرن
ل پێخەمەت بلندکرنا ئاستێ زانستی و ئاشنابوونا مامۆستایان ب داویین پێشهاتێن تەکنۆلۆژیایێ د بواری ڤەکۆلینان دا، ل ڕێکەفتی ٣٠ی حوزەیرانا ٢٠٢٦ێ، وۆرک شۆپەکێ بەرهەمدار ل ژێر ناڤونیشانێ "دیارکرنا پلاتفۆرمێن ڤەکۆلینان" بۆ گشت ستافێ ئەکادیمی یێ هەلگرێن ناسناڤێن زانستی ل کۆلیژا تەکنیکی یا زاخۆ هاتە ڕێکخستن.
ئەڤ وۆرک شۆپە کو ل هۆلا کۆنفرانسان ل کۆلیژێ برێڤەچوو، ژ لایێ مامۆستا (م.هـ. ایاد عبدالرحمن سلیم)، بەرپرسێ سەنتەرێ ڤەکۆلینان ل کۆلیژا تەکنیکی زاخۆ، هاتە پێشکێشکرن. ئارمانجا سەرەکی یا وۆرک شۆپی، روونکرنا لایەنێ دیجیتالی و سیستمێ ئەلیکترۆنی یێ نوو بوو، دا کو مامۆستا ب ساناهیتر کارێن خۆ یێن زانستی بەڵاڤ بکەن و پەرە ب پێگەهێ زانکۆیێ بدەن.
د دریژاهیا وۆرک شۆپێ دا، مامۆستای ب تێرۆتەسەلی تیشک ئێخستە سەر سێ تەوەرێن سەرەکی کو گریدایی کاری مامۆستایان یێ ڕۆژانە نە:
بکارهینانا پلاتفۆرمێ زانکۆیێ: ڕوونکردنا میتۆدێ دروست بۆ کارکرنێ ل سەر پلاتفۆرمێ ڤەکۆلەران یێ ناڤخۆیی، یێ کو د ناڤ مالپەرێ فەرمی یێ زانکۆیێ دا هاتیە جیگیرکرن.
میکانیزما تۆمارکرنا بابەتان: دیارکرنا ڕێکار و پێنگاڤێن پێدڤی بۆ ناڤ تۆمارکرنا ڤەکۆلینێن زانستی ل سەر پلاتفۆرمێ گشتی یێ زانکۆیا پۆلیتەکنیکی یا دهۆک.
پرۆسیسا فۆرمێن خەلاتکرنێ: شروڤەکرنا چاوانیا پرکرنا فۆرمێن پاداشتکرنا دارایی و مەعنەوی بۆ وان ڤەکۆلینێن بهێز بەلاڤ دکەن.
ل دوماهیا وۆرک شۆپی، دەرگەهێ پرسیار و تێبینیان بۆ مامۆستایێن ئامادەبووی هاتە ڤەکرن. بەشداربوویان ب هزر و دیتنێن خۆ یێن جیاواز بابەت زەنگین کرن، و ب ڕێکا پرسیارێن خۆ گشت تەوەر و بابەت گەنگەشە کرن، ڤێ چەندێ ژی دەولەمەندی و گرنگیەکا زێدەتر دا ڤێ چالاکیا ئەکادیمی.