زانکویا پولیتەکنیکى یا دهوك ل پارێزگەها دهوکێ سەر ب هەرێما کوردستانا عیراقێ ڤە کو خودان حکومەت و پەرلەمانێ خویێ سەربەخویە ل سالا ٢٠١٢ هاتیە دامەزراندن و ئێکە ژ سێ زانکویێن پولیتەکنیکى یێن هەرێما کوردستانێ و ژ 6 پەیمانگەه 5 کولیژێن تەکنیکى پێک دهێت و هەبونا وێ ڤەدگەریتە سالا ١٩٨٨ دەمێ دامەزراندنا پەیمانگەها تەکنیکى دهوک.

و ئەڤ زانکویە دەرچویێن ئامادەیى لقێن زانستى و وێژەیى ل دیڤ کونمرا وان وەردگریت و سالا خواندنا وان ل دوماهیا هەیڤا ئەیلولێ دەست پی دکەت تا دوماهیا هەیڤا حزیرانێ ب دوماهى دهێت و پروگرامێن خواندنێ ل زانکویا پولیتەکنیک ل دیڤ ستراتیژیا حکومەتا هەرێمێ و پێدڤیا بازارى و ب سەرپەرشتیا دلنیاى جورى یا وەزارەتا خواندنا بالا برێڤە دچن. و زانکو کاردکەت بو خورتکرنا پەیوەندیێن خو دگەل زانکویێن جیهانى ب رێکا یاداشتێن لێک تێگەهشتنێ بو بلندکرنا ئاستێ خواندنێ و پێشڤەبرنا بوارێن خواندنا تەکنیکى ب شێوەکێ بەرفرهە و بەرهەم ئینانا قوتابیێن خودان شیان بو پرکرنا پێدڤیێن جڤاکى.