سمينارەک بۆ ستافێ کۆلێژا تەکنیکی یا دهۆک هاتە پێشکێشکرن

د چوارچۆڤێ بزاڤ و دەستپێشخەریێن بەردەوام یێن زانکۆیا پۆلیتەکنیکی یا دهۆک – سەنتەرێ ڤەکۆلینێن زانستی، یێن کو ئارمانج ژێ پشته‌ڤانیکردنا ستافێ ئەکادیمی و دابینکرنا ژینگۆهەکا گونجایە بۆ داهێنان و ڤەکۆلینێن زانستی، سمینارەکا تایبەت ژ لایێ پ. د. دکتور دیار سائیب، رێڤەبەرێ سەنتەرێ ڤەکۆلینێن زانستی، ل هۆلا سمیناران ل سەرۆکاتیا زانکۆیێ، بۆ ستافێ مامۆستایێن کۆلێژا تەکنیکی یا دهۆک هاتە پێشکێشکرن.

ئەڤ سمینارە ب مەرەما پێشئێخستنا شیانێن ستافێ ئەکادیمی و بهێزکرنا رۆلێ وان د خزمەتکرنا جڤاکی دا هاتبوو رێکخستن. د ده‌مێ سمینارێ دا، بارودۆخێ ڤەکۆلینێن زانستی ب هووربینی هاتە بەحسکرن، ب جەختکرن ل سەر سێ تەوەرێن سەرەکی:

• تەوەرێ ئێکێ: گرێدایی باشکرنا کوالیتا ڤەکۆلینان و دانانا پلانێن نوو بوو بۆ بلندکرنا ئاستێ ڤەکۆلینێن زانستی بۆ ئاستەکێ نێودەولەتی یێ پێشکەفتی.
• تەوەرێ دووێ: سەرنج ل سەر چارەسەرکرنا ئاستەنگان بوو، دگەل گەنگەشەکرنا وان تەحەدیێن دبنە رێگر ل پێشیا ڤەکۆلەران، و پێشکێشکرنا چارەسەریێن گونجای بۆ وان کێشەیان.
• تەوەرێ سێێ و دوماهییێ: تیشک ئێخستە سەر هاندانا کارێ ب کۆم، ب جەختکرن ل سەر گرنگیا پێکئینانا "گرووپێن ڤەکۆلینێ" یێن کو تێدا چەندین مامۆستا ب هەماهەنگی کار دکەن بۆ ب دەستڤەئینانا ئەنجامێن باشتر.

دهێتە چاڤەرێکرن کو ئەڤ چالاکییە ببیتە پێنگاڤەکا گرنگ بۆ ستافێ ئەکادیمی یێ هەمی کۆلێژ و پەیمانگه‌هێن تەکنیکی یێن سەر ب زانکۆیا پۆلیتەکنیکی یا دهۆک ڤە، ب مەرەما بهێزکرنا ژینگه‌ها زانستی ل زانکۆیێ و پشته‌ڤانیکردنا ڤەکۆلەران بۆ بەرهەمئینانا کارێن زانستی یێن نوو و ب بهاداری.